සුපිරි පළාත් එක්දින තරගාවලිය කල් යයි

පවතින අයහපත් කාලගුණ තත්ත්වය හේතුවෙන් එළැඹෙන 20 දා පැවැත්වීමට නියමිතව තිබූ සුපිරි පළාත් එක්දින තරගාවලියේ අවසන් මහ තරගය දින නියමක් නොමැතිව කල් දැමූ බව ශ්‍රී ලංකා ක්‍රිකට් ආයතනය නිවේදනය කරයි.

ගාල්ල හා කොළඹ කණ්ඩායම් අතර ආර්. ප්‍රේමදාස පිටියේදී අවසන් තරගය පැවැත්වීමට නියමිතය තිබුණි. ක්‍රිකට් ආයතනය දැනුම් දෙන්නේ අවසන් තරගය පැවැත්වෙන දිනය ඉදිරියේදී දැනුම් දෙන බවයි.

නිරෝෂා ප්‍රියදර්ශනී

 

ඇන්ජලෝ – ලක්මාල් කොදෙව් තරගාවලියට සූදානම්

සංචාරක ශ්‍රී ලංකා කණ්ඩායම හා සත්කාරක කොදෙව් කණ්ඩායම අතර පැවැත්වීමට නියමිත තරග තුනකින් සමන්විත ටෙස්ට් තරගාවලියට ක්‍රීඩා කිරිම සඳහා ආබාධයකට ලක්ව සිටි සුරංග ලක්මාල් හා සීමිත පන්දුවාර නායක ඇන්ජලෝ මැතිව්ස්ට හැකියාවක්  පවතින බව ක්‍රිකට් ආයතනය නිවේදනය කරයි.

ඔවුන් දෙදෙනාම 17 දෙනෙකුගෙන් යුත් කණ්ඩායමට නම් කර ඇති අතර මැතිව්ස් හා ලක්මාල් තරගාවලියට ක්‍රීඩා කිරීම ඔවුන් ශාරිරීක යෝග්‍යතා පරීක්ෂණයෙන් සමත්වීම මත තීරණය වෙන බව ක්‍රිකට් ආයතනය නිවේදනය කරයි.

නිරෝෂා ප්‍රියදර්ශනී

පළාත් 5කට දිස්ත්‍රික්ක 2කට තද වැසි

අද (21දා) පෙ.ව. 11.00 සිට ඉදිරි පැය 24 එනම් හෙට පෙරවරු 11.00 දක්වා බස්නාහිර, සබරගමුව, ඌව, මධ්‍යම හා වයඹ පළාත් හා ගාල්ල හා මාතර දිස්ත්‍රික්කවල තද වැසි ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි. එසේම විටින් විට  පැයට කිලෝමීටර් 40-45 පමණ වන තරමක් තද සුළංද ඇතිවිය හැකි බවත් එම දෙපාර්තමේන්තුව නිකුත් කළ විශේෂ නිවේදනයක දැක්වෙයි.

නිරෝෂා ප්‍රියදර්ශනී

ගිංගඟත් පිටාර ගලයි

ගිං ගඟ පිටාර ගැලීමෙන් හිනිදුම මහබෝධිවත්ත ප්‍රදේශය මේවන විට අඩි පහක් පමණ ජලයෙන් යටවී ඇතැයි ගාල්ල දිස්ත්‍රික් ආපදා කළමනකරණ මධ්‍යස්ථානය පවසයි. හිනිදුම පොලිසිය ඉදිරිපිට පාර,තවලම නෙළුව මාර්ගයේ මාවනාන ප්‍රදේශය, නෙළුව බටුවංගල ප්‍රධාන මාර්ගය උඩුගම කාටගොඩ හන්දිය, නෙළුව දූලි ඇල්ල පාර ජලයෙන් යටවෙමින් පවතී.  මේ ප්‍රදේශයේ සියලුම මාර්ග ජලයෙන් යටවී පවතින බැවින් ගමනාගමනය සම්පූර්ණයෙන් ඇණහිට ඇතැයි වාර්තා වේ. අද දිනය පුරාම පැවති තද වැස්ස මේ වනවිට තරමක් අඩුවී ඇතත් කළගුණ විද්‍යා දෙපාර්තමේන්තුව පවසන්නේ ඉදිරි පැය 12ක කාලයේ තද වැසි බලාපොරොත්තු විය හැකි බවයි. ඇතිවිය හැකි ආපදා තත්ත්වයට මුහුණදීම සඳහා යුද හා නාවුක හමුදා භට කණ්ඩායම් සහිත මුදවාගැනීමේ කණ්ඩායම් 7 ක් අදාළ ප්‍රදේශ වෙත යොමු කළ බව ආපදා කළමනාකරණ මධ්‍යස්ථානයේ අධ්‍යක්ෂක කර්නල් දම්පත් රත්නායක මහතා පවසයි. බද්දේගම, වක්වැල්ල,පෝද්දල හා උක්වත්ත ආදී ප්‍රදේශයන්හි පහත් බිමිද ජලයෙන් යටවීමේ අවදානමක් පවතින බව වාර්තා වන අතර ආපදා කළමනාකරණ මධ්‍යස්ථානය පවසන්නේ එම ප්‍රදේශවල ද සුළු ගංවතුර තත්ත්වයක් ඇතිවිය හැකි බවයි.

ඔයවල් 6ක් අවධානම්

රත්නපුර, නිවිතිගල,දෙහිඕවිටි අධ්‍යාපන කලාපවල පාසල් වහයි

වැසි හේතුවෙන් පාසල් පැවැත්වීමේ බලය පළාත් හා කලාප අධ්‍යක්ෂවරුන් වෙත

රත්නපුර, නිවිතිගල,දෙහිඕවිටි අධ්‍යාපන කලාපවල පාසල් වහයි

කාලගුණ තත්ත්වය හේතුවෙන් සබරගමු දිස්ත්‍රික්කයේ අධ්‍යාපන කලාප තුනක පාසල් අද (21) සහ හෙට (22) දිනයන් හි වසා දැමීමට කටයුතු කළ බව සබරගමුව පළාතේ අධ්‍යාපන ලේකම් මහින්ද සනත් වීරසුරිය මහතා පැවසිය. ඒ අනුව රත්නපුර, නිවිතිගල,දෙහිඕවිටි යන කලාප වල පාසල් මෙලෙස වසා දමා තිබේ. සබරගමුව පළාතේ අනෙකුත් පාසල්වල විදුහල්පතිවරුන්ට ඇතිවන තත්ත්වය අනුව ඔවුන්ගේ අභිමතය පරිදි පාසල් වසා දැමීමට බලය පවරා ඇති බව වැඩිදුරටත් පැවසීය. 

ඔයවල් 6ක් අවධානම්

වැසි හේතුවෙන් පාසල් පැවැත්වීමේ බලය පළාත් හා කලාප අධ්‍යක්ෂවරුන් වෙත

පවතින අයහපත් කාළගුණ තත්ත්වය හේතුවෙන් ගංවතුර සහ නායයාම් තත්ත්වයන්ට මුහුණ දී ඇති ප්‍රදේශවල පිහිටි පාසල් පැවැත්වීම හෝ නොපැවැත්වීම පිළිබඳ තීරණය කිරීමේ බලය පළාත් හා කලාප අධ්‍යාපන අධ්‍යක්ෂවරුන්ට ලබාදීමට අධ්‍යාපන අමාත්‍ය අකිල විරාජ් කාරියවසම් මහතා උපදෙස් ලබා දී තිබේ.

ඒ අනුව අදාළ පාසලේ විදුහල්පතිවරුන්ට ආපදා තත්ත්වය හේතුවෙන් තම පාසල පවත්වා ගෙන යාමට නොහැකි තත්ත්වයක් මතුව ඇත්නම් ඒ පිළිබඳ පළාත් හෝ කලාප අධ්‍යාපන අධ්‍යක්ෂවරුන් දැනුවත් කොට තීරණයකට එළඹිය හැකියි.

පවතින තත්ත්වය හේතුවෙන් මේ වනවිට දිස්ත්‍රික්ක කිහිපයක පාසල් පැවැත්වීමේ කටයුතුවලට බාධා මතුව ඇති බවට තොරතුරු වාර්තා වී ඇති බැවින් සහ ආපදා තත්ත්වයකදී දරුවන්ගේ ආරක්ෂාව වෙනුවෙන් ඉක්මනින් තීරණ ගැනීමේ අවශ්‍යතාව මත මෙම තීරණය ගත් බව  අධ්‍යාපන අමාත්‍ය අකිල විරාජ් කාරියවසම් මහතා පවසයි.

(රජයේ නිල පුවත් සේවය)

මහනුවර උසස් බාලිකාවේ ශිෂ්‍ය භට ඛණ්ඩයට උසස් ජයක්

 

ආරක්ෂක අමාත්‍යාංශය හා අධ්‍යාපන අමාත්‍යාංශය එක් ව සංවිධානය කළ ජාතික ශිෂ්‍ය භට බලකා යුද ඇගයීම් පළමු කඳවුරේ අංශ ගණනාවකින් විශිෂ්ට ජයක් ලබා ගැනීමට මහනුවර උසස් බාලිකාවේ ශිෂ්‍ය භට ඛණ්ඩය සමත් වී ඇත.

ශිෂ්‍ය භට බලකායේ සේනා විධායක ලුතිතන් කර්නල් පාලිත මෙන්ඩිස්තුමාගේ ප්‍රධානත්වයෙන් රන්ටැඹේ පුහුණු මධ්‍යස්ථානයේ දී පැවැති මෙම විසිර යාමේ උ‍ළෙලේ දී භට නිවාස පරීක්ෂණය, ගණ සරඹ පරීක්ෂණය ප්‍රථම ස්ථාන ද, ශාරිරික අභ්‍යාස, සේනා විධායක හා ඉදිරිපත් කිරීමේ පරීක්ෂණවලින් දෙවැනි ස්ථාන ද හිමි කර ගත් අතර ශාරීරික අභ්‍යාස හොඳ ම අණ දෙන්නිය ලෙස සාජන් දිනිති පෙරේරා ද සම්මාන හිමි කර ගත්තා ය.

ශිෂ්‍ය භට ඛණ්ඩය විදුහලට ලබා දුන් ජයග්‍රහණය වෙනුවෙන් විදුහල්පතිනි එම්. අබේගුණසේකර මහත්මිය ශිෂ්‍ය භට බලකායේ ඛණ්ඩ භාර නිලධාරිනී ලුතිතන් ඉඳුනිල් සෙනෙවිරත්න මෙනෙවියට සුබ පැතුම් පිරි නැමූ අවස්ථාව මෙහි දැක්වේ. නියෝජ්‍ය විදුහල්පතිනි චම්පිකා කරුණාදාස මහත්මිය ද, ශිෂ්‍ය භට ඛණ්ඩ භාර ආචාර්ය සිසිර වික්‍රමසිංහ මහතා ද මෙහි වෙති.

( ඇන්ටන් විජේරත්න විසිනි )

 

 

2018 මැයි මස 21 වන දින උදෑසන 05.30 ට නිකුත් කරන ලදි. දිවයිනේ නිරිත දිග කොටසේ පවතින වැසි සහිත කාලගුණ තත්ත්වය සහ අහස වළාකුලින් බර ස්වභාවය තවදුරටත් බලාපොරොත්තුවේ. බස්නාහිර,දකුණු,සබරගමු,මධ්‍යමසහවයඹපළාත්වල විටින් විට වැසි හෝ ගිගුරුම් සහිත වැසි ඇති වේ. සෙසු පළාත්වල විශේෂයෙන් සවස 2.00 න් පසු වැසි හෝ ගිගුරුම් සහිත වැසි ඇති වේ. සබරගමුවසහ බස්නාහිර පළාත්වලත් ගාල්ලසහමාතර දිස්ත්‍රික්කවලත් ඇතැම් ස්ථානවලට මි.මී.150 ක පමණ ඉතා තද වැසි ඇති විය හැක. මධ්‍යම,වයඹ සහ ඌව පළාත්වලත් හම්බන්තොට දිස්ත්‍රික්කයෙත් ඇතැම් ස්ථානවලට මි.මී.100ට වැඩි තද වැසි ඇති විය හැක. ගිගුරුම් සහිත වැසි ඇති වන විට එම ප්‍රදේශවල තාවකාලිකව තද සුළං ඇති විය හැක. අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ. (කාලගුණ විද්‍යා දෙපාර්තමේන්තුව)

2018 මැයි මස 20 වන දින උදෑසන 05.30 ට නිකුත් කරන ලදි. නිරිතදිග මෝසම් තත්වය දිවයින හරහා ස්ථාපිත වෙමින් පවතී. අදදින දිවයිනේ නිරිත දිග කොටසේ පවතිනවැසිසහිතකාලගුණ තත්ත්වයේ වැඩිවීමක් අපේක්ෂා කෙරේ.  බස්නාහිර,දකුණු,සබරගමුව, මධ්‍යම සහ වයඹ පළාත්වල විටින් විට වැසි හෝ ගිගුරුම් සහිත වැසි ඇති වේ. සෙසු පළාත්වල විශේෂයෙන් සවස 2.00 න් පසු වැසි හෝ ගිගුරුම් සහිත වැසි ඇති වේ. සබරගමුව පළාතේ ඇතැම් ස්ථානවලට මි.මී.150 ක පමණ ඉතා තද වැසි ඇති විය හැක. මධ්‍යම, ඌව සහ බස්නාහිර පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථානවලට මි.මී.100ට වැඩි තද වැසි ඇති විය හැක. ගිගුරුම් සහිත වැසි ඇති වන විට එම ප්‍රදේශවල තාවකාලිකව තද සුළං ඇති විය හැක. අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.