උසස් පෙළ සිසුන්ට ටැබ් දීම අත්හිටුවයි

පාසල්වල උසස් පෙළ හදාරන සිසුන්ට ටැබ් පරිගණක ලබාදිමේ වැඩසටහන කැබිනට් මණ්ඩලය විසින් අද (20) අත්හිටවනු ලැබීය. ජනාධිපති මෛත්‍රීපාල සිරිසේන මහතාගේ උපදෙස් මත කැබිනට් මණ්ඩලය මෙම තීරණය ගෙන ඇති බව වාර්තා වේ. ටැබ් පරිගණක මිලදී ගැනීම සඳහා කැඳවා ඇති ටෙන්ඩර්වල පවතින ගැටලු සහගත තත්ත්වය සහ එම වැඩසටහනට වැය කිරිමට රජයේ අරමුදල් යෙදවීම සැලකිල්ලට ගනිමින් කැබිනට් මණ්ඩලය මෙම තීරණය ගෙන තිබේ.

පාසල්වල උසස් පෙළ හදාරණ සිසුන්ට ලබාදීම සඳහා ටැබ් පරිගණක මිලදී ගැනීමේ යෝජනාව අධ්‍යාපන ඇමැති අකිල විරාජ් කාරියවසම්  මහතා විසින් ඉදිරිපත් කර තිබිණි. ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් පැවති කැබිනට් රැස්වීමේ දී අදාළ යෝජනාව සාකච්ඡා වී ඇති අතර එහිදී අදහස් දක්වා ඇති ජනාධිපතිවරයා මේ සම්බන්ධයෙන් කරුණු 4 ක් එකතු කළ බව වාර්තා වේ.

උසස් පෙළ සිසුන්ට ටැබ් පරිගණක ලබාදිම ප්‍රයෝජනවත්ද? සිසුන්ට ටැබ් පරිගණක ලබාදිම වෙනුවට නවීන පන්ති කාමර සකස් කිරිම ටෙන්ඩර් අවුල සහ රජයේ අරමුදල් ටැබ් පරිගණක මිලදී ගැනීමට වඩා අත්‍යාවශ්‍ය කටයුතු වෙනුවෙන් වැය කිරිමට තිබිම යන කාරණා ජනාධිපතිවරයා විසින් එහිදී  මතු කරන ලදැයි දැනගන්නට තිබේ.

Pic – digitaltrends.com 

අතිපූජ්‍ය ගිරාඹේ ආනන්ද අනුනාහිමියන්ගේ ආදාහන පූජෝත්සවය ලබන 24 වන දා රාජ්‍ය අනුග්‍රහයෙන්.

අනුරාධපුර ශ්‍රී සාරානන්ද පිරිවෙන්මහා විහාරාධිපති, ශ්‍රී ලංකා රාමඤ්ඤ මහා නිකායේ අනු නායක, අත් පූජ්‍ය ගිරාඹේ ආනන්ද අනුනාහිමිපාණන් වහන්සේගේ ආදාහන පූජෝත්සවය ලබන 24 වන සෙනසුරාදා අනුරාධපුර වලිසිංහ හරිස්චන්ද්‍ර ක්‍රීඩාංගනයේදී පස්වරැ 3.00 සිදු කිරීමට ආදාහන පූජෝත්සව කමිටුව තීරණය කර ඇත.

අනුනායක හිමියන්ගේ ශ්‍රී දේහය අද (20 දා) සවස 5.00 කොළඹ ජයරත්න මල්ශාලාවේ සිට රිය පෙරහැරින් පේරාදෙණිය ශ්‍රී සාරානන්ද පිරිවෙන වෙත වැඩම කර වීමට නියමිත අතර, 2018/02/21 වන දින ශ්‍රී දේහය නැවත කෑගල්ල පොල්ගහවෙල හරහා නාරම්මල සීලවතී පිරිවෙන වෙත පෙ.ව 11.30 ට වැඩමවා, පස්වරැ 2.00 ට වාරියපොළ පාදෙනිය හරහා අනුරාධපුර ශ්‍රී ඝනානන්ද පිරිවෙන් මහා විහාරය සක්වා වැඩම කරවීමට නියමිතය. 2018/02/21 දින පස්වරැවේ සිට 2018/02/24 දක්වා අනුනාහිමියන්ගේ ශ්‍රී දේහය අනුරාධපුර ශ්‍රී සාරානන්ද පිරිවෙන් මහා විහාරයේ තැන්පත් කර තැබෙන අතර 24 වන සෙනසුරාදා පස්වරැ 3.00 පූර්ණ රාජ්‍ය අනුග්‍රහය සහිතව අනුරාධපුර වලිසිංහ හරිස්චන්ද්‍ර ක්‍රීඩාංගනයේදී ආදාහන පූජෝත්සවය සිදු කරනු ලබයි.

(උපේක්ෂා මුණවීර) 

විදුහල්පති නායකත්ව පුහුණුව තාවකාලිකව නවත්වයි

විදුහල්පතිවරුන් සඳහා ලබාදෙන නායකත්ව පුහුණු වැඩමුළු තාවකාලිකව නවතා දැමීමට අධ්‍යාපන අමාත්‍ය අකිල විරාජ් කාරියවසම් මහතා උපෙදස් ලබා දී ඇත. ඒ නායකත්ව වැඩමුළුවක් අතරතුර හම්බන්තොට සුචී ජාතික පාසලේ විදුහල්පතිවරිය මිය යෑමේ සිදුවීම හේතුවෙනි. මේ පිළිබඳව අමාත්‍යාංශ මට්ටමින් පරීක්ෂණයක් පැවැත්වීමට අධ්‍යාපන අමාත්‍යවරයා අමාත්‍යංශ ලේකම් සුනිල් හෙට්ටිආරච්චි මහතාට උපදෙස් ලබා දී ඇති අතර එම පරීක්ෂණය අවසන් වන තෙක් නායකත්ව පහුණුව තාවකාලිකව නවත්වා ඇත.

කුරුණෑගල වාරියපොළ, වයඹ නායකත්ව පුහුණු කඳවුරේ දී පැවති පුහුණු වැඩසටහනක් අතරතුර හදිසි අනතුරකට ලක්වීමෙන් අනතුරුව විදුහල්පතිවරිය මිය ගියාය.

විදුහල්පතිවරුන්ගේ පෞරුෂ සංවර්ධනය හා නායකත්ව ගුණාංග ඉහළ නැංවීම අරමුණු කරගනිමින් මෙම පුහුණු වැඩසටහන්  ක්‍රියාත්මක කර තිබේ.

අනතුරින් මිය ගිය හම්බන්තොට සුචී ජාතික පාසලේ විදුහල්පති රෝහිණී අතපත්තු මහත්මිය අධ්‍යාපන අමාත්‍යාංශයේ මෙහෙයවීම යටතේ මීට පෙර රන්ටැඹේ සහ කුඩාඔය පැවති නායකත්ව පුහුණු වැඩසටහන් දෙකක් සඳහා ද සහභාගී වී ඇත.

නිරෝෂා ප්‍රියදර්ශනී

ඉත්තෑපානේ ධම්මාලංකාර හිමි ජයවර්ධනපුර සරසවියේ නව කුලපති තනතුරට

ශ්‍රී ජයවර්ධනපුර විශ්වවිද්‍යාලයේ කුලපතිවරයා ලෙස සියම් මහා නිකායේ කෝට්ටේ ශ්‍රී කල්‍යානි සාමාග්‍රි ධර්ම මහා සංඝ සභාවේ මහානායක අති පූජ්‍ය ඉත්තෑපානේ ධම්මාලංකාර හිමියන් පත් කර තිබේ.

ඒ අනුව ඉදිරි වසර 05ක කාලයක් පූජ්‍ය ඉත්තෑපානේ ධම්මාලංකාර හිමියන් මෙම ධූරයේ කටයුතු කිරීමට නියමිතය.

ශ්‍රී ජයවර්ධනපුර විශ්වවිද්‍යාලයේ කුලපති ධූරය හෙබවූ  මහාචාර්ය අති පූජ්‍ය බෙල්ලන්විල විමලරතන හිමිගේ අපවත්වීමෙන් පසු එම ධූරය පුරප්පාඩු විය.

නිරෝෂා ප්‍රියදර්ශනී

ගිරාඹේ ආනන්ද අනුනාහිමියෝ අපවත්වෙති

ශ්‍රී ලංකා රාමඤ්ඤ මහ නිකායේ අනුනායක හිමියන් වන ගිරාඹේ ආනන්ද ස්වාමීන්වහන්සේ අපවත්වී තිබේ. උන්වහන්සේ අසනීප තත්ත්වයක් හේතුවෙන් ශ්‍රී ජයවර්ධනපුර රොහලේ ප්‍රතිකාර ලබමින් සිටියදී අපවත්වී ඇත. අපවත්වන වන විට උන්වහන්සේ 80 වැනි වියෝ පසුවූහ. උන්වහන්සේ ශ්‍රී දේහය පිළිබඳ ආදාහාන පූජෝත්වය ඉදිරියේදී දැනුම් දීමට නියමිතය. පවත් වී  වදාල ශ්‍රී ලංකා රාමඤ්ඤ මහා නිකායේ අනුනායක ගිරාඹේ ආනන්ද හිමියන් අසනීප තත්ත්වයක් හේතුවෙන් ශ්‍රී ජයවර්දනපුර රෝහලේ ප්‍රතිකාර ලබමින් සිටියදී අද අලුයම අපවත් වී ඇත.

උන්වහන්සේ අනුරාධපුර ශ්‍රී සාරනන්ද මහා පිරිවෙනේ හා පේරාදෙණිය ශ්‍රී සාරනන්ද පිරිවෙනේ විහාරධිපති ධුරය දරමින් සිටියහ. අද (20) පස්වරුවේදි පේරාදෙණිය ශ්‍රී සාරනන්ද පිරිවෙනට වඩම්මවන ශ්‍රී දේහය හෙට (21) දින උදැසන උන් වහන්සේ වැඩ සිටි අනුරාධපුර ශ්‍රී සාරනන්ද මහා පිරිවෙනට වැඩමවන බව ද විහාරාධිකාරී අරණායක ශාන්ත හිමියන් පැවැසුහ.

නිරෝෂා ප්‍රියදර්ශනී


ටිබට් බෞද්ධ හදවතක ගින්නක්

ටිබට් බෞද්ධ ජනයාගේ මහා පුදබිමක් වන යොකාංග් (Jokhang) ආශ්‍රමය සෙනසුරාදා ගිනි රකුසාට බිලි විය. ටිබට් දේශයේ ලාසා (Lhasa) අගනුවර පිහිටි පුදබිම් අතරත් මුල්තැන හිමිකර ගත් ඓතිහාසික බෞද්ධ විහාරයකි.  ගින්නට හසුවීමෙන් ආශ්‍රමයේ වහල බිමට කඩා වැටෙන ආකාරය අන්තර්ජාලයේ පළ කෙරුණ වීඩියෝ දර්ශන මගින් පෙන්නුම් කෙරේ. ගින්න නිසා මිනිස් ජීවිතවලට සිදු වූ හානියක් වාර්තා නොවෙයි. සෙනසුරාදා (පෙබරවාරි 17) සන්ධ්‍යාවේ බෞද්ධ විහාරය ගින්නට ගොදුරු වූ බවත් එය ඉක්මනින් මැඩ පවත්වන ලද බවත් චීන රාජ්‍ය මාධ්‍ය වාර්තා කළේය. ගින්නෙන් විනාශ වී ගිය විහාරස්ථානයට සිදු වූ හානියේ තරම තක්සේරු කරනු ලැබ නැති අතර විහාරස්ථානයේ වැඩ සිටි සංස්කෘතිකමය වටිනාකමක් සහිත ධාතූන් වහන්සේලාට හානියක් සිදුව නැති බව චීන රාජ්‍ය මාධ්‍ය පවසයි. "ලෝකයේ පියස්ස" ලෙස හඳුන්වනු ලබන ටිබට් දේශය චීන පාලනයට යටත් ස්වතන්ත්‍ර පාලනයක් සහිත බෞද්ධ ප්‍රදේශයකි.

බිබිසි පුවත් සේවය
Pic Courtesy twitter and wikipedia

කෘතීම වැසි ලබාගැනීමේ ජාත්‍යන්තර වැඩමුළුවක්

විදුලිබලාගාර ආශ‍්‍රිත ජලාශයන් වෙත කෘතීම වැසි ලබාදීම පිළිබඳව තාක්ෂණික දැනුම ලබාදීමේ ජාත්‍යන්තර වැඩමුළුව, විදුලිබල හා පුනර්ජනනීය බලශක්ති අමාත්‍ය  රංජිත් සියඹලාපිටිය මහතාගේ ප‍්‍රධානත්වයෙන් අද (19) පැවැත්වේ. මෙම සමුළුව හෙට කොළඹදී පැවැත්වෙන අතර රටවල් කිහිපයක නියෝජිතයින් මෙම අවස්ථාවට සහභාගිවීමට නියමිතය.

 

බර්නාඩ් අලුවිහාරේ ක්‍රීඩාංගණයට කෘතිම ධාවන පථයක්

නවීකරණය කරන ලද මාතලේ බර්නාඩ් අලුවිහාරේ ක්‍රීඩාංගණයට රුපියල් මිලියන 327ක් වැය කරමින් මීටර් 400 කෘතිම ධාවන පථයක් එක්කිරීමට ක්‍රීඩා අමාත්‍යංශය කටයුතු යොදා ඇත. ඒ අනුව මෙම කෘතිම ධාවන පථයේ ඉදිකිරීම් කටයුතු 2018 වසරේ දී නිමා කිරීමට ද සැලසුම් කොට ඇත. බර්නාඩ් අලුවිහාරේ ක්‍රීඩාංගණය මාතලේ දිස්ත්‍රික්කයේ දැනට පවතින විශාලතම ක්‍රීඩාංගණය වේ. මෙම ක්‍රීඩාංගණය අනුරාධපුර, පොළොන්නරුව, යාපනය, මඩකලපුව, ත්‍රිකුණාමලය, මහනුවර, බදුල්ල හා කුරුණෑගල යන දිස්ත්‍රික්කවලින් පැමිණෙන ක්‍රීඩක ක්‍රීඩිකාවන්ගේ ක්‍රීඩා කටයුතු සඳහා යොදා ගැනේ.

(රජයේ නිල පුවත් සේවය)

2018 පෙබරවාරිමස 19 වන දින උදෑසන 05.30 ට නිකුත් කරන ලදි. ඉදිරි දින කිහිපයේදී, දිවයිනේ බොහෝ පළාත්වල වියලි කාලගුණ තත්ත්වයන් සහ තරමක් ශීත උදෑසන සහ රාත්‍රී කාලයන් (විශේෂයෙන් උතුර ,උතුරු මැද සහ නැගෙනහිර පළාත්වල) අපේක්ෂා කළ හැක. කෙසේ වෙතත්,සවස 2.00 න් පසු ගාල්ල සහ මාතර දිස්ත්‍රික්කවල ස්ථාන ස්වල්පයක වැසි හෝ ගිගුරුම් සහිත වැසි ඇතිවිය හැකිය. දිවයිනේ සමහර ප්‍රදේශවල උදය කාලයේදී මීදුම් සහිත තත්ත්වයක් බලාපොරොත්තු විය හැක. (කාලගුණ විද්‍යා දෙපාර්තමේන්තුව)

ලංකාව විස්සයි20 තරගාවලියත් දිනයි – ලකුණු 75 ක ජයක්

බංග්ලාදේශයේ ශිලාත් අන්තර්ජාතික ක්‍රිකට් ක්‍රීඩාංගණයේදී අද පැවැති දෙවැනි විස්සයි-20 තරගයේදී ලකුණු 75 ක විශිෂ්ට ජයක් අත්කරගැනීමට ශ්‍රී ලංකා කණ්ඩායම සමත් විය. මෙම ජයත් සමගින් විස්සයි-20 තරගාවලිය 2-0 ක් ලෙසින් ජයගැනීමටද ශ්‍රී ලංකා පිල සමත් විය. ශ්‍රී ලංකාව –  ඕවර 20 කදී කඩුලු 4 ක් දැවී ලකුණු 210 යි. බංග්ලාදේශය – ඕවර 18.4 කදී සියලු දෙනා දැවී ලකුණු 135 යි.

 

 

 

 

Pic Courtesy: Associated Press